Festivali i RTSH-së, sfidë e re për Soni Malaj

Pas suksesit në festivalin “Kënga Magjike” me këngën “Shpirti im binjak”, me të cilën fitoi çmimin e tretë dhe atë të internetit, këngëtaren e njohur nga Shqipëria, Soni Malaj, tashmë e pret edhe një sfidë tjetër. Në një intervistë dhënë “Gazetës Shqiptare”, Soni ka bërë të ditur se aktualisht është duke punuar intensivisht rreth pjesëmarrjes së saj në festivalin e Radio Televizonit Shqiptar, nga i cili zgjidhet përfaqësuesi i Shqipërisë për festivalin evropian të këngës “Eurosong”.“Kënga është 90% e përfunduar. Deri në afatin përfundimtar unë jam akoma duke punuar me këngën. Na ka lindur një ide që ndoshta edhe mund ta ndryshojmë ritmin. Së bashku me kompozitorin Florian Mumajesi dhe orkestruesin Enis Presheva jemi akoma duke punuar për të nxjerrë më të mirën, ashtu sikurse më ndodhi edhe për “Këngën Magjike”, ka thënë Soni, duke shtuar se nuk do të jetë në duet me kantautorin Flori.E pyetur nëse pretendon “Eurosong”-un, Soni ka thënë: “Të bëhet, ç’të bëhet. Në fund të fundit, për këngëtarin gjithmonë kënga e vet mbetet më e mira. Le të shpresojmë”.Krahas pjesëmarrjes në këtë festival, këngëtarja Malaj, ka bëtë të ditur se këtyre ditëve do të qëndrojë në Kosovë, për arsye se do të realizojë videoklipin e këngës “Më merr” në bashkëpunim me hip-hop grupin “Tingulli 3nt”. Lidhur me këtë videoklip Malaj ka thënë se ideja ka qenë që ai të realizohet më parë, por këtë e kanë pamundësuar angazhimet e shumta të saj.Në këtë intervistë Soni nuk ka hezituar të flasë edhe për jetën e saj private.Lidhur me thashethemet e fundit në mediat e Shqipërisë për një lidhje të mundshme të saj me dikë nga Franca, Soni është shprehur: “Dua ta sqaroj para publikut që nuk kam të dashur amerikan, as francez, as kinez apo palestinez. Jam vetëm. Nuk kam një lidhje dhe ndihem mirë kështu si jam. Ditët e mia janë të mbushura plot. Jam shumë e lumtur dhe s’kam nevojë për momentin të kem njeri përkrahë. Dua të sqaroj se në Francë është mikesha ime e ngushtë, Elia”.Ndryshe, sa i përket kantautorit Florian Mumajesi me të cilin ka qenë në lidhje më herët, Soni ka thënë se marrëdhëniet në mes tyre janë shumë të mira, si kolegë dhe miq. Ajo ka shtuar se bashkëpunimi me Florin nuk duhet të kuptohet si një relacion dashurie.