Nokia hulumton transmetimin pa tela të energjisë elektrike

Nokia planifikon që me sistemin e vet “të kap” energjinë e burimeve ekzistuese të energjisë siç janë rrjetet WiFi, transmetuesit televiziv apo transmetuesit e rrjeteve mobile.
Gjiganti finlandez Nokia po përgatitet për përdorimin e parë komercial të teknologjisë së transmetimit të energjisë elektrike pa tela.

Nokia planifikon që teknologjinë e tillë ta integrojë në celularët e saj, por për fillim ka ambicie shumë më të vogla. Ideja e tyre do të ishte të grumbullojnë energjinë elektromagnetike nga burimet ekzistuese të rrezatimeve elektromagnetike siç janë rrjetet mobile, rrjetet WiFi, transmetuesit televiziv dhe radio komunikimet.

Qëllimi është të grumbullohen së paku 50 mili-vat të energjisë, që nuk janë mjaftueshme për punën e telefonit mobil, por dukshëm të ngadalësojë zbrazjen e baterisë në pritje e madje edhe të mbush pajisjen e fikur.

Tani për tani në Nokia kanë arritur “të kapin” gjithsej pesë mili-vat të energjisë, që është e padobishme, por ekspertët e kësaj kompanie të madhe besojnë se do të arrijnë qëllimin e tyre në të ardhmen e afërt; ndoshta për dy-tri vjet.