Titulli: Henri: Shpëtova nga “makthi”!

Francezi: Suksesi në Ligën e Kampioneve ishte kthyer në një lloj fiksimi
Sulmuesi francez i Barcelonës, Tierri Henri, ka folur i qetë për herë të parë pas fitimit të Ligës së Kampionëve. Henri, i cili e humbi këtë trofe në vitin 2006 me Arsenalin, pikërisht kundër Barçës, ka pohuar se Liga e Kampionëve ishte trofeu i vetëm i madh që ai nuk kishte fituar. Henri i tha këto fjalë gazetës franceze “L’Equipe”: “Kam dashur ta fitoj prej kohësh dhe më në fund ia dola mbanë. Kam hequr një peshë të madhe nga shpina. Pesë minutat e fundit të ndeshjes ishin më të gjatat në jetën time. Kam shpëtuar nga një lloj makthi, fiksimi…” Henri më pas ka falënderuar trajnerin Pep Guardiola, duke thënë: “Ky sezon ishte i jashtëzakonshëm dhe Liga e Kampionëve ishte mbyllje perfekte e sezonit. Fituam gjithçka. Duhet të falënderoj Guardiolën, sepse ai më bindi të qëndroja”. Më në fund, Henri dha një shembull të rolit të tij si lider në skuadër, duke thënë: “Kur po fitonim Kupën e Botës dhe unë isha vetëm 20 vjeç, Marsel Dezaji më mori veçmas dhe më pyeti se a e kuptoja atë që po arrinim. Gjatë festimeve tona në Romë, unë ua thashë të njëjtën gjë Mark Muniesas dhe Bojanit”. Këtë sezon Henri ka shënuar 25 gola për skuadrën e Barcelonës.