Luani iu kërkon falje tifozëve të tij
Boksieri kosovar Luan Krasniqi, iu ka kërkuar falje tifozëve të tij pas zhgënjimit të mbrëmshëm kur, megjithëse dominoi rundet e para të përballjes me ukrainasin Aleksander Dimitrenko, u nokautua pas një goditje të pësuar në rundin e tretë.
“Kërkoj falje nga adhuruesit emi që i zhgënjeva, por nuk munda të bëj asgjë. Bëra më të mirën që munda. Mendova se e kisha situatën nën kontroll”, ka thënë Krasniqi pas boksimit të mbrëmshëm.
Ndërkaq Dimitrenko thotë se goditja triumfuese e tij kishte qenë shumë më e fuqishme se ç’kishte menduar dhe shton se ai tash është i gatshëm të luftojë në nivel të kampionit.
“E di që adhuruesit nuk ishin me mua. Por mendoj se i kam bindur.E kapa me një grusht shumë të mirë, i cili goditi më fuqishëm se ç’mendova”, ka thënë Dimitrenko.
“Jam i gatshëm të luftoj në nivel të kampionit tash. Jam stërvitur me Wladimir Klitschko dhe e di çfarë duhet”, ka shtuar ukrainasi.
I njohur si Sasha, Dimitrenko tash mban rekord prej 29 fitoresh nga po aq boksime, 19 prej të cilave, përfshirë edhe këtë të fundit, me nokaut. Ndërkaq kjo ishte humbja e katërt e Krasniqit, kundrejt 30 fitoreve dhe një barazimi në karrierën profesionale të tij.